O CEIP Ramón de Artaza y Malvárez organizou este sábado, 31 de xaneiro, unha xornada festiva para celebrar o 50 aniversario do centro educativo, á que asistiron centos de persoas, entre o alumnado presente e ex-alumnado, profesorado, veciños e representantes institucionais do Concello, da Corporación local e da Consellería de Educación.
Os actos comezaron cun espectáculo infantil a cargo do Mago Paco e a actuación sorpresa de Samuel, Xaquín e Xanma, ex alumnos do Ramón de Artaza e membros de The Rapants.
No acto central, A Nosa Historia, interviron Aurora Rey Lago, actual directora do centro; Margarita Novo Malvárez, profesora titular de Historia de Arte na Universitat de les Illes Balears e alumna da 1ª promoción; J. Miguel Blanco Fernández, mestre e antigo director do centro; Judit Fernández, directora xeral de Ordenación e Innovación Educativa da Xunta, e María Lago Lestón, alcaldesa do Concello de Muros e antiga alumna do centro.
Na súa intervención, María Lago destacou “a importancia de loitar polo ensino público e pola igualdade de oportunidades para todos os nenos e nenas”, lembrando anécdotas da súa etapa como alumna: “A riada do 94, as clases de ximnasia ou as excursións”.
Aurora Rey asegurou que o gran obxectivo do centro nestes 50 anos “foi e segue sendo formar persoas con valores e espírito crítico”, mentres que Margarita Novo repasou a traxectoria do escritor e académico de Muros Ramón de Artaza Malvárez.
Miguel Blanco falou da súa etapa de 20 anos como director do centro, “cando tiñamos un comedor para 1.000 alumnos e chegaron as novas tecnoloxías”, e Judit Fernández felicitou “á comunidade educativa do Ramón de Artaza, un exemplo de calidade no ensino”.
Posteriormente, Moncho, neto de Ramón de Artaza, descubriu unha placa conmemorativa e todos os asistentes desfrutaron dun aperitivo de confraternidade.
