As máis de 1.500 persoas -mariscadoras e mariscadores- que viven do seu traballo nos areais da ría de Noia asisten estoicamente -ende ben que con moito cabreo- á morte de milleiros (toneladas) de crías de berberecho que cubren, coas cunchas ao sol (cando este racha os nubeiros preñados de auga) que o mar, os regatos e o río esparexen nos bancos deste bivalvo que con tanto afán sementaron e coidaron, sabedores por experiencia de que a súa propia sobrevivencia como traballadores do mar depende da mortaldade por baixa salinidade que os citados bancos marisqueiros poidan soportar.
Chámanlle tren de borrascas ao que non é outra cousa que a maior desgraza que pode soportar o que estaría a piques de ser o toque de diana para o comezo -o dous de marzo- da campaña que levaría a cada unha das casas dos mariscadores implicados unha pinga de optimismo na, en teoría, vindeira primavera.
A praia do Testal, un dos principais bancos produtivos de berberecho, é hoxendía un cimeterio de bivalvos que, mortos a consecuencia dos temporais de choiva e vento do último mes, son a día de hoxe, unha especie de bodoque no enxoval das mulleres e homes que agardaban ilusionados a poxa dos novos lotes de berberecho. Esas cunchas que a marea acocha no Testal non son outra cousa que as bágoas de centos de familias que se ven na obriga de facer fronte a unha situación socioeconómica que, desgraciadamente, é máis que coñecida para todos os que confiaban en que, desta volta, a tocata ía ser outra.
Mais non vai ser así: as catas feitas nos bancos do Testal, San Cosme, A Misela, Couso, Taboleiro e O Freixo no son, nen moito menos, optimistas: Os vendavais -con ou sen tren- van continuar, co que a situación dos bancos, lamentablemente, irá a peor.
A maior parte da moita cría de berberecho que había no pasado outono non medrou o necesario para dar unha talla comercial e, por riba, o fitoplancton non aguantou na ría, o que tampouco contribuiu ao seu engorde. Sumada a baixa salinidade nos areais causada polos temporais e a descontrolada apertura das comportas do encoro do Tambre da unha imaxe aproximada do que é unha triste realidade: máis dun 30% do berberecho que había está morto.
