O estudo Intervento resultou gañador do Concurso Internacional de Iluminación da Catedral de Santiago de Compostela, impoñéndose na fase final co seu anteproxecto “Hermes”. A resolución do xurado, adoptada o pasado 3 de febreiro e publicada na Plataforma de Contratación do Sector Público, permitirá ao estudo asumir a redacción do proxecto executivo e a dirección da obra piloto na Praza de Praterías.
A intervención en Praterías actuará como banco de probas para a futura implantación progresiva do novo sistema lumínico en todo o conxunto catedralicio, incluíndo as prazas do Obradoiro, Quintana e Inmaculada, así como os espazos de conexión entre elas.
O proxecto “Hermes” obtivo 95 puntos sobre 100, destacando en todos os criterios avaliados: calidade do deseño lumínico, viabilidade técnica e económica, eficiencia enerxética, protección ambiental e innovación tecnolóxica. O xurado subliñou a claridade do deseño, a xerarquización da luz mediante gradientes e contrastes, e o uso intelixente da penumbra para realzar a arquitectura sen distorsionala.
Un dos aspectos decisivos foi a mínima intervención sobre o patrimonio: a proposta de Intervento é a única que garante a iluminación ornamental do conxunto sen instalar novos elementos sobre as cubertas de pedra recentemente rehabilitadas, preservando así a integridade do Ben de Interese Cultural.
En materia técnica e económica, o proxecto destaca pola precisión dos cálculos, a selección de luminarias de distintas marcas —que facilita o mantemento a longo prazo— e un orzamento considerado axustado e viable. Ademais, prevé un aforro enerxético do 68 %
