A Xunta de Galicia activa este mércores 11, a alerta laranxa por vento no noroeste da Coruña e na Mariña de Lugo, e mantén a alerta laranxa por choiva no interior de Pontevedra, ao tempo que estende a todo o litoral galego a alerta laranxa por fenómenos costeiros.
Segundo a Axencia Estatal de Meteoroloxía, agárdanse rachas de vento de ata 100 quilómetros por hora a partir de media mañá nestas zonas, polo que se recomenda retirar obxectos de tellados, balcóns e fiestras que poidan caer á rúa, así como evitar pasar preto de edificios en ruínas ou en construción, árbores, paneis publicitarios ou outros elementos susceptibles de desprazarse co vento. No interior da provincia de Pontevedra mantense a alerta laranxa por choiva intensa, polo que se pide extremar a precaución na condución, informarse do estado das estradas, non atravesar zonas inundadas nin estacionar en ribeiras de ríos.
Comunicación aos concellos e servizos de emerxencias
A Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do 112 Galicia aos concellos das provincias afectadas, así como ás deputacións, servizos provinciais, agrupacións de voluntarios de Protección Civil e clubs náuticos. O obxectivo é reforzar a coordinación dos medios e garantir a protección de bens e persoas ante o episodio de inestabilidade previsto para as vindeiras horas.
Impacto nos centros educativos
Debido á alerta laranxa por choiva acumulada, a Comisión Escolar de Alertas decidiu suspender durante toda a xornada de mañá, mércores 11, as actividades no exterior dos centros educativos dos 16 concellos da zona Interior de Pontevedra. Pola mesma razón, e pola alerta laranxa por vento, tamén quedan suspendidas as actividades ao aire libre nos centros dos 38 concellos da zona noroeste da Coruña e dos 15 concellos da Mariña de Lugo.
Temporal costeiro en todo o litoral
O fenómeno meteorolóxico adverso costeiro de nivel laranxa, que hoxe afecta ao noroeste e oeste do litoral da Coruña e á costa de Lugo, estenderase a partir da madrugada de mañá a todo o litoral galego, con mar combinada do oeste e ondas de ata 6 metros, que poderían acadar os 8 metros pola tarde. Prevese tamén vento do suroeste ou oeste de ata forza 8, polo que se recomenda extremar a prudencia nas actividades marítimas.
A Secretaría Xeral para o Deporte anunciou a suspensión da actividade deportiva federada e do programa Xogade no exterior nos concellos afectados polas alertas laranxas por choiva, vento e temporal costeiro. Os concellos afectados e os horarios de vixencia das alertas poden consultarse na web de Deporte Galego.
En relación co temporal marítimo, a Xunta lembra a importancia de manterse afastado da liña de costa, especialmente de diques, rompentes e paseos marítimos, para evitar golpes de mar. Tamén se recomenda extremar as medidas de seguridade en calquera actividade no mar e revisar cabos e amarres das embarcacións para minimizar riscos
