O Concello de Muros está a desenvolver estes días tarefas de limpeza e mantemento no casco histórico, levadas a cabo pola brigada de obras do Concello cola colaboración do grupo de emerxencias GES. O obxectivo é garantir a seguridade e limpeza dos enlousados e empedrados cubertos de capa vexetal por mor do exceso de humidade: “Este inverno tan chuvioso fixo que se acumule verdello na pedra, polo que para evitar o risco de caídas estase a facer a limpeza”, informou o Concello, engadindo que os traballos concentráronse nas rúas Don Diego, Florida, Canavala, Xixón, Anxo, Rosal, A Saúde ou a praza de Pescadería. Este xoves 12 de febreiro continuarán as tarefas nas rúas e prazas lindeiras.
O Concello tamén fixo saber que a brigada de obras deu continuidade aos traballos de mantemento na rede de estradas e camiños municipais. Esta semana actuouse en varias zonas, incluída a parroquia de Tal (na imaxe). “É necesario limpar as cunetas dos camiños, xa que se acumula nelas moita vexetación polos sucesivos temporais”, explica a concelleira de Obras, Laura Rivadeneira. Estes traballos continuarán nas próximas semanas por todo o termo municipal.
