A Asociación Ambar das Persoas con Diversidade Funcional, entidade inclusiva do Barbanza, quedou finalista co seu Diversos Podcast nos Premios Youtubeiras, que recoñecen os mellores contidos web en galego. A gala, celebrada no Teatro Jofre de Ferrol, recoñeceu a calidade e a innovación na creación de contido dixital na nosa lingua.
O equipo de Diversos Podcast da Asociación Ambar das Persoas con Diversidade Funcional celebra o seu paso pola gala de entrega dos Premios Youtubeiras, celebrada recentemente na cidade de Ferrol. O proxecto foi seleccionado como finalista na categoría de Podcast, consolidándose como unha das propostas de referencia no panorama da comunicación dixital en Galicia.
A gala de entrega de premios serviu como punto de encontro para os creadores máis destacados da nosa terra nunha xornada marcada polo talento, a retranca e a reivindicación do galego como lingua de creación de vangarda.
Dende Diversos Podcast quixeron agradecer publicamente o labor da organización de Youtubeiras por dar visibilidade ós novos formatos e, de xeito moi especial, á súa audiencia.
“Aínda estamos cas emocións a flor de pel. Estar nomeados entre tanto talento é un premio en si mesmo. Grazas a todas as persoas que nos acompañan en cada episodio e que fan que este proxecto medre día a día”, sinalan dende a produción do espazo.
