O bloqueo petroleiro contra Cuba foi condenado pola Organización das Nacións Unidas (ONU). Ao mesmo tempo, este organismo internacional anunciou o despregamento de axuda humanitaria tendente a paliar a crise enerxética e alimentaria que, por tal medida coercitiva, agudiza a situación na illa caribeña.
A resolución da ONU condenou explicitamente, en sesión de urxencia, o bloqueo á subministración de combustible a Cuba. Coida a ONU que se trata dunha violación ao Dereito Internacional e unha ameaza ao benestar humano.
Deste xeito procederase a activar unha ponte humanitaria coordinada por axencias da ONU para garantir o envío de medicamentos, alimentos e recursos esenciais.
Salientou o Secretario Xeral que “asfixiar enerxeticamente a un país é unha maneira de castigo colectivo incompatíbel coa Carta das Nacións Unidas”.
Esta resolución chega após a orde executiva de Donald Trump (do 29 de xaneiro pasado) que declaraba unha “emerxencia nacional” co obxecto de impoñer sancións a quen venda petróleo a Cuba. A medida foi denunciada por este país coma un “acto de guerra económica” e foi rexeitada por Rusia, Vietnam, China, México e outros moitos países.
Ven ser esta a primeira vez que a ONU condena especificamente o bloqueo enerxético coma a unha violación separada do bloqueo económico xeral , sentando un precedente xurídico internacional, representando un apoio abrumador á soberanía cubana e un rexeitamento global á política de máxima presión de EUA.
O chanceler cubano Bruno Rodríguez, presente na sesión, afirmou que “esta votación non é só un trunfo diplomático: é un tributo á resistencia do noso pobo e unha reivindicación de que o mundo non aceptará que se use a fame e a escuridade coma armas de política exterior”.
A resolución non é vinculante, pero exerce unha forte presión política e moral. Dáse como moi probable que o Consello de Seguridade discuta a ilegalidade das sancións extraterritoriais, e que a axuda humanitaria comece a chegar nos vindeiros días a través de corredores verdes protexidos.
