Moitas mulleres continúan sufrindo as consecuencias do machismo e o patriarcado. Como pode ser que algúns energúmenos oculten ou aplaudan os acosos sexuais ou violacións sobre as mulleres? Demasiados enxendros da natureza aínda non entenden de que o non é non, son depredadores sexuais que buscan ás vítimas máis propicias e indefensas. Son como asasinos en serie, nunca atopan o momento de parar coas súas atrocidades.
Non se libra ninguén, nin na política, nin nos centros de traballo, nin no funcionariado, nin entre os axentes da autoridade, nin no núcleo familiar, ningunha muller está libre de ser agredida, acosada, violada ou humillada por parte dun home que se cree co dereito para dar renda solta aos seus instintos máis primarios.
As vítimas son criminalizadas no canto de axudalas e protexelas. Os presuntos culpables, depredadores sexuais, son amparados por unha banda da sociedade e moito máis cando se trata dalgunha persoa importante, famosa, con poder mediático ou económico. Sempre se busca algunha xustificación do depredador para criminalizar á vítima e que se sinta humillada, deprimida e soa para que desista de exercer calquera tipo de acción legal.
