CONGALSA, grupo empresarial da Pobra especializado en produtos do mar conxelados e solucións de valor engadido para as canles retail e foodservice, formalizou a adquisición do 100% da compañía vietnamita Lenger Seafoods Vietnam Ltd. (LS Vietnam), con sede en Nam Dinh. A operación está actualmente pendente da obtención das autorizacións correspondentes por parte das autoridades vietnamitas e doutros stakeholders implicados, “polo que”, segundo explicou a firma da Pobra do Caramiñal con sede principal na Tomada, “non será efectiva ata a formalización definitiva das devanditas aprobacións”.
Con esta adquisición, CONGALSA fortalece a súa posición internacional no continente asiático e reforza a súa división industrial. Trátase dunha empresa especializada no procesamento e exportación de ameixa e outros produtos do mar, que destaca polo seu firme compromiso coa sustentabilidade, a rastrexabilidade e a excelencia produtiva. Cun volume anual de facturación superior aos 16 millóns de euros, LS Vietnam conta cun persoal que supera as 200 persoas. A operación supón un paso decisivo no posicionamento de CONGALSA dentro do segmento de produtos do mar de alto valor engadido. Isto é así porque a compañía vietnamita, fundada en 2006, dispón de acceso directo a fontes excepcionais de materia prima, o que garante unha subministración constante e estábel de ameixa premium.
