O director xeral de Xustiza, José Tronchoni, visitou este 26 de febreiro o concello de Ribeira con vistas a supervisar o inicio do proceso de retirada e destrución dos vehículos abandonados situados na contorna do Xulgado e na entrada da subida ao Parque Periurbano de San Roque. Trátase de vehículos que levaban máis de 30 anos neste emprazamento, froito de distintas operacións xudiciais, e que co paso do tempo acabaron converténdose nun foco de degradación e nunha imaxe de abandono e insalubridade “nun punto especialmente sensíbel de Santa Uxía tanto pola súa proximidade ás dependencias xudiciais e vivendas como por constituír a porta de acceso ao pulmón verde do municipio”, explicou o Concello, engadindo que para poder proceder á súa retirada viña sendo preciso acceder aos números de bastidor, algo que “resultaba imposíbel debido ao estado de maleza da parcela”.
Co obxectivo de “desbloquear definitivamente o procedemento”, o Concello de Ribeira procedeu á limpeza integral do terreo, permitindo así o acceso por parte da Garda Civil e da Dirección Xeral de Tráfico para a identificación dos vehículos.
Dende o Goberno local sinalaron que “este avance é tamén o resultado dun traballo que xa na anterior etapa municipal comezou a impulsar María Sampedro, daquela como concelleira, iniciando as xestións necesarias para desatascar unha situación que levaba décadas sen solución”.
Dende o Concello agradeceron expresamente a colaboración da Dirección Xeral de Xustiza e das distintas administracións implicadas, cuxa coordinación posibilitou que este proceso avance cara á súa resolución definitiva nos vindeiros días. O Goberno local reafirmou o seu “compromiso coa mellora do espazo público” e anunciou que “continuaremos traballando para que situacións de abandono e feísmo desaparezan do noso concello, dignificando os accesos urbanos e coidando a imaxe de Ribeira”.
