A parroquia de Castiñeiras acolleu a última das reunións Parroquias con Voz desenvolvidas polo BNG, pechando así unha rolda de encontros que permitiu facer balance directo coa veciñanza e comprobar de primeira man os avances acadados nos últimos dous anos e medio de mandato.
O portavoz e exalcalde, Luís Pérez Barral, cualificou esta etapa como “moi positiva e histórica” polo volume de investimentos realizados e polo impacto real na mellora da calidade de vida no rural.
Durante a xuntanza, as veciñas e veciños trasladaron propostas e novas necesidades relacionadas coas rozas e mantemento de camiños, pavimentacións e reforzo de servizos básicos. Pérez Barral e o seu equipo agradeceron a participación e destacou que “escoitar á veciñanza sempre foi e seguirá sendo un dos nosos sinais de identidade malia que agora outros pretendan copiarnos”.
No balance presentado falou “do importante impulso inversor realizado en Castiñeiras chegando a 680.000€ en dous anos e medio con actuacións que contribuíron a modernizar espazos públicos e infraestruturas básicas”.
Entre estas actuacións destacou a renovación do paseo dos Mosqueiros 200.000€, a creación do paseo da Ameixida 163.000€ e as melloras na área deportiva do Castro 15.000€ No ámbito dos servizos básicos executáronse obras de pluviais e pavimentación nas rúas Revolta e Fonteseca 91.000€, a pavimentación da rúa Curros 90.000€ e a renovación do firme no Camiño dos Páramos 64.000€. Ademais, dixo, “queda preparado e consignado o proxecto para renovar a liña de traída de auga nos Mosqueiros en 2026, cun investimento de 63.000 euros”.
O portavoz nacionalista subliñou que “a acción de goberno permitiu investir 5,5 millóns de euros nas parroquias para ampliar saneamento, abastecemento e pavimentacións, deixando ademais outros 1,5 millóns listos para novas actuacións este ano; en total, máis de 7 millóns de euros destinados a reforzar servizos e infraestruturas no rural de Ribeira”. Tamén destacou a evolución económica municipal: “A xestión do PP fixo que Ribeira teña unha débeda de 13 millóns de euros mentres que o BNG deixa 6,5 millóns para proxectos de futuro, iso é exemplo de xestión responsábel e eficaz”.
A reunión de Castiñeiras puxo o broche final a un ciclo de nove xuntanzas parroquiais celebradas nas últimas semanas, caracterizadas, segundo destacou o BNG, “pola elevada participación veciñal e polo ambiente construtivo de diálogo directo”. Segundo sinalou Pérez Barral, “estes encontros permitiron recoller propostas, avaliar necesidades reais e contrastar co conxunto da veciñanza os resultados da acción de goberno”.
O portavoz destacou especialmente “o respaldo recibido durante esta rolda”, afirmando que nas distintas reunións “percibiuse un apoio maioritario á nosa forma de gobernar, baseada no traballo, no rigor e na atención directa ás parroquias”. Salientou ademais que “esta resposta cidadá reforza a vontade de continuar traballando na mesma liña, con proximidade, responsabilidade e compromiso de seguir formulando propostas positivas”.
Para rematar, Pérez Barral quixo trasladar “unha mensaxe de continuidade e proximidade”, asegurando que “malia concluír esta rolda de encontros, seguirá estando á disposición da veciñanza para escoitar, atender propostas e defender os intereses das parroquias de Ribeira en todo momento”.
