O núcleo de Frións, na parroquia de Carreira (Ribeira), foi este martes 10 de febreiro pola tarde o escenario dun aparatoso accidente de tráfico na estrada DP-7301. No dispositivo de emerxencia do accidente traballaron as dotacións de garda do Grupo de Emerxencias e Protección Civil Municipal (GAEM de Ribeira), dos Bombeiros de Ribeira, da Policía Local e da Garda Civil de Tráfico, mobilizados polo CIAE 112. O accidente consistiu na saída de vía dun Renault Megane que se esnafrou contra un poste telefónico tronzándoo pola metade. No sinistro, malia a súa aparatosidade (o turismo ficou envorcado no medio da vía), non houbo que lamentar danos persoais, xa que o condutor saíu ileso do seu vehículo. Foi preciso manter a circulación cortada durante case unha hora (no treito de estrada que vai dende o Colexio de Frións até a rotonda de Xarás).
