A Xunta activou desde a madrugada deste xoves a alerta laranxa por choiva intensa no interior da provincia de Pontevedra e por temporal costeiro no litoral da Coruña e Pontevedra, unha situación que se estenderá ao mediodía do xoves á Mariña lucense.
A Dirección Xeral de Emerxencias e Interior, dependente da Consellería de Presidencia, informou da situación a través do 112 Galicia a concellos, deputacións, agrupacións de Protección Civil, servizos provinciais e clubs náuticos, co obxectivo de garantir a seguridade das persoas e bens.
Segundo a Axencia Estatal de Meteoroloxía (Aemet), prevese que no interior pontevedrés se acumulen máis de 80 litros de auga por metro cadrado en 12 horas, podendo chegar a superar os 100 —ou mesmo os 120 litros— nun período de 24 horas. Recoméndase extremar a precaución nas estradas, evitar zonas asolagadas e manterse afastado dos cursos fluviais.
Suspensión das actividades exteriores nos colexios
A Comisión Escolar de Alertas decidiu suspender este xoves, 5 de febreiro, todas as actividades no exterior dos centros educativos de 16 concellos da zona interior de Pontevedra: Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
Pola súa banda, a Secretaría Xeral para o Deporte anunciou tamén a suspensión da actividade deportiva federada e do programa Xogade ao aire libre nos concellos afectados, segundo as previsións meteorolóxicas.
Temporal costeiro con ondas de ata sete metros
Ademais, desde a madrugada deste xoves estará activa a alerta laranxa por temporal costeiro na costa da Coruña e Pontevedra, que se ampliará a partir do mediodía ao litoral de Lugo. Agárdase mar combinada de oeste con ondas de ata sete metros e vento do suroeste forza 7, con refachos que poderían alcanzar forza 8.
A Xunta recomenda extremar as precaucións, evitar achegarse a diques, rompentes e paseos marítimos, así como revisar cabos e amarres das embarcacións. Mantense tamén suspendida toda a actividade deportiva no mar.
Trece ríos en seguimento
O Plan de control e seguimento do caudal dos ríos (Inungal) continúa activo e vixía actualmente 13 ríos nas provincias da Coruña, Ourense e Pontevedra.
Na Coruña están en seguimento o Mero (Cambre), Sar (Ames), Barcés (Abegondo), Valiñas (Culleredo) e Tambre (Oroso e Trazo). En Pontevedra, o Maceiras (Redondela), Lérez (Pontevedra), Miñor (Gondomar) e Miño (Salvaterra de Miño). Este último tamén está vixiado nos concellos ourensáns da Peroxa, Ribadavia e Ourense cidade. En Ourense contrólanse, ademais, o Avia (Ribadavia), Arnoia (Baños de Molgas), Limia (Bande) e Támega (Castrelo do Val e Oímbra).
