Entre eles Muros, A Barquiña (Outes), Ribeira, A Pobra do Caramiñal, Carril (Vilagarcía), Vilanova de Arousa e O Grove
A conselleira do Mar, Marta Villaverde, presentou esta mañá no porto de Baiona o plan de renovación de pavimentos de pantaláns e outras instalacións flotantes que levará a cabo Portos de Galicia en dez peiraos da comunidade. A actuación conta cun orzamento total de 640.000 euros e atópase xa en proceso de licitación pública.
Villaverde, acompañada polo presidente de Portos de Galicia, José Antonio Álvarez, explicou que os traballos beneficiarán aos portos de Baiona, Lorbé (Oleiros), Muxía, Muros, A Barquiña (Outes), Ribeira, A Pobra do Caramiñal, Carril (Vilagarcía), Vilanova de Arousa e O Grove. As obras consistirán na retirada dos pavimentos de madeira deteriorados dos pantaláns, pasarelas e fingers, que serán substituídos por materiais tecnolóxicos de maior resistencia e durabilidade. O prazo de execución previsto é de sete meses.
Segundo destacou a conselleira, o obxectivo desta intervención é mellorar a seguridade do tránsito nestas instalacións flotantes, reducindo o risco de esvaróns ou accidentes, e substituír aquelas táboas danadas polo paso do tempo e as condicións marítimas.
En canto ao porto de Baiona, Villaverde detallou que se actuará concretamente nos pantaláns 2, 3 e 4, destinados ao sector profesional pesqueiro, cun investimento total de 125.000 euros. As obras incluirán a renovación da madeira dos pavimentos, fingers e brazos de amarre. Durante a execución dos traballos, garantirase o acceso dos usuarios ás súas embarcacións mediante medidas de seguridade e dispositivos habilitados para tal fin.
