Non concordan, malia teren asinado un acordo de libre comercio que negociaron durante máis dun cuarto de século e que significa a zona de libre comercio máis grande do mundo. Hai dúas semanas, o Parlamento Europeo decidía votar a revisión de compatibilidade de xeito que o Tribunal de Xustiza da Unión (TXUE) dea por válida ou non esa compatibilidade cos tratados comunitarios, o que supón a paralización da súa efectividade ata que os xuíces se pronuncien.
A medida atrasa ata dous anos a entrada en vigor do maior pacto comercial da historia da Unión Europea.
Sobre a mesa queda a validez legal do mecanismo de reequilibrio que inclúe o pacto que, a xuízo de varios deputados, pode afectar á autonomía regulamentaria da UE e mesmo a base legal elixida para a súa aprobación, que permite que os capítulos do acordo centrados en comercio podan ratificarse sen o consentimento dos parlamentos nacionais.
Segundo o TXUE, este tipo de opinións tardan entre 18 e 24 meses en ser decididas, ende ben a corte ten o control total sobre os procedementos e pode, cando as circunstancias o requiran, dar prioridade a unha solicitude de opinión na práctica.
Diferentes voces dentro do Parlamento Europeo xa avisaran de que se trataría dun voto moi axustado e advertiran en contra de atrasar a ratificación do acordo co envío do seu texto ao TXUE , especialmente diante das ameazas arancelarias de Donald Trump polo envío de tropas a Groenlandia por parte de oito países europeos.
Mentres tanto agricultores e armadores de pesca de Galicia e outros países comunitarios levan sine die as súas protestas ás estradas e rúas en demanda de solucións que semellan non estar exclusivamente nas mans dos seus respectivos gobernos.
