O grupo UCIN Boiro, a través do seu coordinador Miguel Piqueras, vén de emitir un novo comunicado no que critica o estado no que se atopa a estrada de Berres, unha vía fundamental que conecta Boiro con O Saltiño e Cabo de Cruz e que, indican, “soporta diariamente un elevado volume de tráfico de veciñanza, traballadores e servizos básicos”. Para a agrupación a vía atópase nun estado de “abandono prolongado”, con “numerosas
fochancas de gran tamaño, o firme completamente degradado e ausencia total de mantemento, o que supón un grave risco para a seguridade viaria e provoca danos continuos nos vehículos”, indicou Piqueras, engadindo que a situación “resulta especialmente perigosa para os peóns, xa que a vía carece de beirarrúas e de iluminación pública, a pesar de ser utilizado habitualmente pola veciñanza da zona”.
UCIN dixo tamén que “as persoas residentes levan anos reclamando unha reparación integral” e que “en 2021 a Deputación da Coruña e o Concello de Boiro anunciaron publicamente un proxecto de mellora que nunca chegou a executarse”.
