O grupo UCIN Boiro emitiu un comunicado no que critica ao Concello polos traballos de acondicionamento realizados na vivenda de emerxencia social presentada recentemente no polo Goberno local, unha actuación financiada con fondos públicos (75.000 euros), sosteñen dende UCIN, que “incumpre os requisitos básicos de accesibilidade universal desde o seu acceso principal”.
Critican que a entrada “presenta unha escaleira con chanzos, carece de rampla, pasamáns ou calquera alternativa válida para persoas con mobilidade reducida, usuarios de cadeira de rodas, persoas maiores ou familias con carriños infantís”.
O coordinador de UCIN Boiro, Miguel Piqueras, esixiu explicacións públicas inmediatas sobre como se aprobou e executou un proxecto con, nas súas palabras, “deficiencias tan evidentes, a asunción de responsabilidades políticas pola mala xestión de fondos públicos, e a corrección urxente da falta de accesibilidade mediante solucións seguras e totalmente axustadas á normativa vixente”.
