Ses presenta en Asados o libro-disco Nadando na incerteza. A Leoira e Teatro Airiños organizan un encontro coa cantautora coruñesa.
Asados foi o lugar escollido por María Xosé Silvar (Ses) para presentar o seu último traballo (o libro-disco Nadando na incerteza) na ría de Arousa.
Trátase do primeiro libro da cantautora, que vai acompañado do seu último traballo discográfico.
Este domingo 1 de febreiro ás 6 da tarde, o Centro Cultural Simón Varela acollerá o acto organizado polas asociacións A Leoira e Teatro Airiños.
Unha presentación na que haberá quenda de preguntas para o público e posterior sinatura de exemplares.
Nadando na incerteza é en palabras da autora “un traballo acústico e fundacional que inaugura unha nova etapa”. Son, engade, “cancións despoxadas que respiran soas, coa palabra e a melodía no centro”.
