O Multiúsos de Rois acolleu este sábado, 31 de xaneiro, a presentación de Por unha promesa, a primeira novela de Mercedes Autrán, natural da aldea de Casas do Porto, nun acto cargado de emoción que reuniu a numerosa veciñanza, así como familiares e amizades da autora.
O encontro contou coa presenza do alcalde de Rois, Ramón Tojo, da tenente de alcalde Mercedes Basante e da concelleira Victoria Quiroga, que quixeron acompañar á escritora nunha xornada especialmente significativa. Durante o acto, o público sorprendeu a Mercedes Autrán cantándolle o “Cumpreanos feliz”, xa que a presentación coincidiu co seu aniversario, protagonizando un momento entrañable que puxo de manifesto a proximidade e o cariño da veciñanza.
O alcalde foi o encargado de abrir o acto, destacando a importancia de contar con referentes locais: “Este tipo de iniciativas son vitais para o noso desenvolvemento, porque axudan a que todas as persoas teñan modelos nos que mirarse e, especialmente, a que a cativada vexa que quen é da aldea tamén pode facer un labor importante e inspirador”, sinalou.
No transcurso da presentación interviron tamén a politóloga Marta Casal, que afondou nun dos aspectos máis singulares da novela, como é a nacionalidade surcoreana do protagonista, e o cantante Antonio Barros, gañador do programa Recantos da TVG en 2017. Barros falou e cantou ao amor como eixo vertebrador da obra, personificado na figura da nai da autora, principal fonte de inspiración que levou a Mercedes Autrán a escribir esta novela.
Ao remate do acto, as persoas asistentes puideron adquirir exemplares do libro, que foron asinados pola autora, e compartir un momento de convivencia arredor duns petiscos, pechando así unha mañá cultural marcada pola proximidade, o recoñecemento ao talento local e a participación veciñal.
Con esta iniciativa, o Concello de Rois reafirma o seu compromiso coa promoción da cultura e co apoio ao talento do municipio, favorecendo espazos de encontro que fortalecen a vida cultural e social da localidade.
