O monte veciñal de Leiro acolle o sábado 17 de xaneiro unha nova xornada de voluntariado ambiental promovida polo Laboratorio Ecosocial do Barbanza, centrada na eliminación de especies invasoras e na mellora ecolóxica dos montes comunais. A actividade forma parte da programación vinculada á exposición do proxecto e está aberta á participación da cidadanía.
A xornada desenvolverase entre as 10:00 e as 14:00 horas, con punto de encontro no Centro Cultural Vicente Vidal de Leiro, Rianxo, e conta coa colaboración da Comunidade de Montes Veciñais en Man Común de Leiro e da Plataforma pola Defensa do Monte. A organización corre a cargo da Fundación Montescola, entidade responsábel das accións de voluntariado ambiental no marco do Laboratorio.
Ao longo do desenvolvemento do Laboratorio Ecosocial do Barbanza, máis de 600 persoas voluntarias participaron en máis de 20 xornadas de voluntariado ambiental, contribuíndo á eliminación de especies invasoras, á plantación de frondosas autóctonas e á recuperación de patrimonio natural e cultural. Estas accións reforzan a implicación da comunidade nos procesos de restauración ecolóxica e fomentan unha cultura de corresponsabilidade e interese polo voluntariado ambiental a longo prazo.
A actividade está aberta a todos os públicos e, ao rematar a xornada, ofrecerase un xantar de albaroque ás persoas participantes. As inscricións poden realizarse ata o mércores 14 a través do correo info@montescola.org.
