O Pleno da Corporación de Rois aprobou na sesión ordinaria celebrada este venres 9 de xaneiro destinar 68.653,37 euros a gasto corrente e 8.530,50 euros a investimento con cargo ao POS+ Adicional 1/2026, co obxectivo de financiar gastos sociais extraordinarios.
En total, o Concello de Rois destinará os 77.183,87 euros que lle corresponden da achega provincial deste plan a sufragar parte dos 569.506,33 euros previstos no orzamento municipal para gastos sociais durante o presente exercicio. O punto saíu adiante cos votos favorables do PP (8) e a abstención da oposición (PSdeG e BNG, 3 concelleiros).
Tanto o PSdeG como o BNG amosaron a súa discrepancia co equipo de goberno polo destino dos 8.530,50 euros asignados a investimento, ao considerar que deberían empregarse na compra de material para o uso directo das persoas usuarias dos servizos sociais. A concelleira da área, Mercedes Basante, respondeu que desde o Concello sempre se facilita o material extraordinario que precisan as persoas usuarias e explicou que esta partida queda reservada para a adquisición de mobiliario necesario para o departamento de Servizos Sociais.
No mesmo pleno, e cos votos a favor do PP e do PSdeG e a abstención do BNG, a Corporación aprobou corrixir un erro material detectado nos planos do PXOM na parroquia de Sorribas, co fin de marcar correctamente como equipamentos —relixiosos e cemiterios— a contorna da igrexa parroquial.
Ademais, o Pleno ratificou por unanimidade a resolución da Alcaldía pola que se aproba o proxecto de construción da nova depuradora de Sorribas, unha obra que será executada por Augas de Galicia e que conta cun orzamento de 250.173,07 euros.
No último punto da sesión, o BNG interesouse pola situación da recollida do lixo e pola pertenza do Concello de Rois á Mancomunidade Serra do Barbanza. O alcalde, Ramón Tojo, explicou que Rois, ao igual que Pontecesures, xa non forma parte da mancomunidade. “Temos unha prórroga para poder licitar o servizo de recollida do lixo”, indicou o rexedor, quen tamén sinalou que está mantendo negociacións cos concellos de Dodro, Pontecesures e Padrón para estudar a posibilidade de licitar conxuntamente o servizo e trasladar os residuos a Sogama.
