A práctica totalidade do persoal das escolas deportivas municipais da Coruña secundaron as dúas primeiras convocatorias (das catro acordadas para reclamar a percepción dos seus salarios e que os novos pregos de condicións recollan melloras nas súas condicións económicas e laborai) fixadas para o xoves e o venres pasados. Teñen pendentes de cobro a nómina de decembro de 2025 e a paga extraordinaria de Nadal do mesmo ano, e reivindican que as súas condicións de traballo -a renegociar- contemplen melloras substanciais tanto no que atinxe ao retributivo coma ao laboral.
Reclama este persoal das escolas deportivas municipais da Coruña o cobro inmediato dos salarios non percibidos e as melloras citadas, apoiados por numerosas persoas usuarias cotiáns dos centros afectados pola folga que ten fixadas tamén as datas do 12 e o 13 de xaneiro coa concentración a media mañá deses días diante do Pazo Municipal (Praza de María Pita) dos traballadores, apoiados polos cidadáns.
Os paros son consecuencia da decisión do goberno municipal de lle retirar a prestación do servizo a Serviplus para que a empresa pública municipal Emvsa sexa a encargada de xestionar as instalacións da rede de escolas deportivas do concello coruñés.
A previsión de que Emvsa -que xestiona xa outras entidades municipais- se faga cargo durante un prazo máximo de seis meses das citadas escolas ten que ver coa licitación do servizo a facer por parte do concello mediante un novo contrato e que asuma o pagamento dos salarios non aboados e se materialice a subrogación do devandito contrato. Pasos estes que non poñen remate á incerteza existente nos traballadores diante do troco previsto, polo descoñecemento que teñen das condicións no que o mesmo se vai levar a cabo e cando este se vai producir.
Os traballadores están decididos a manter as súas demandas, mesmo levando a cabo as mobilizacións necesarias.
