O Concello de Muros comezou hai uns días a segunda fase das obras de humanización e renovación integral da rúa Real, uns traballos que contan cun orzamento de máis de 238.000 euros.
“Trátase dun proxecto importante que da resposta ás demandas da veciñanza; a rúa Real necesitaba estas obras de mellora no seu firme e os servizos, unha actuación que se fará respectando a contorna e as características do casco histórico”, explica a alcaldesa, María Lago.
Pola súa banda, a concelleira de Obras, Laura Rivadeneira, engade que “a renovación dos servizos incluirá a rede de saneamento, abastecemento, alumeado público, canalización e rede de telecomunicacións”.
Polo que respecta á pavimentación, e tendo en conta os criterios do Plan Especial de Protección do Conxunto Histórico Artístico de Muros, optouse por unha combinación de lousa de granito con lastras (adoquíns) do mesmo material.
Todos os traballos levaranse a cabo, como outras actuacións similares nesta zona do concello, dándolle prioridade á sostibilidade, a facilidade de mantemento posterior, alta calidade dos materiais, criterios de seguridade e posta en valor do patrimonio histórico.
