O Auditorio do Centro Cultural e Xuvenil de Muros presentou a programación de artes escénicas do primeiro semestre de 2026. Fíxoo a través da concelleira Caridad González, quen sinalou que o centro cultural acollerá unha completa programación de artes escénicas que combina teatro, comedia, monólogo, maxia, circo e propostas familiares, cun total de oito espectáculos entre os meses de xaneiro e abril.
A programación arrinca o sábado 24 de xaneiro coa estrea de Os dous de sempre, de Producións Teatrais Excéntricas, e inclúe nomes destacados da escena galega como Carlos Blanco, Quico Cadaval, Mofa e Befa, Iria Pinheiro ou compañías como Pistacatro, xunto a propostas de maxia, improvisación e circo para todos os públicos.
Dende a Concellería de Cultura, Caridad González sinala que “esta programación mostra a vontade do Concello de Muros de manter unha oferta cultural estable, diversa e de calidade, que combine grandes nomes das artes escénicas galegas con propostas innovadoras e espectáculos para o público familiar”.
A concelleira destacou ademais “a importancia de seguir consolidando o auditorio como un espazo de referencia cultural, con programación regular e accesible todo o ano”.
As funcións celebraranse maioritariamente os sábados, con horarios adaptados segundo o público, e cun prezo das entradas que oscila entre os 3 e os 5 euros, mantendo unha aposta clara pola accesibilidade cultural.
As entradas para o primeiro espectáculo, Os dous de sempre, de Producións Teatrais Excéntricas (Mofa e Befa), xa están á venda.🎟
Poden adquirirse preferentemente a través da billeteira electrónica do Concello de Muros, así como nas oficinas do Centro Cultural e Xuvenil de Muros ou no despacho de billetes do auditorio unha hora antes do comezo de cada espectáculo.
Logo de Os dous de sempre, a seguinte cita será o 7 de febreiro: El profesor Bromera, a cargo da compañía MelaBuffa, ás 18.00 horas. A axenda prosegue o sábado 28 con Vitória, de Iria Pinheiro (ás 20.30 horas) e, xa en marzo, continúa con A penúltima de Carlos Blanco (o día 14 ás 20.30h) e co espectáculo Galerock & Magic, a cargo do Mago Teto (ás 18.00 horas do día 28 de marzo).
