O Concello de Boiro leva a cabo con diversos centros de ensino do municipio uns talleres sobre emprendemento circular e sostíbel. Estas actividades englóbanse no marco do programa de dinamización do Centro de Formación, Innovación e Emprendemento Lab Barbanza.
Participan nesta actividade alumnado de dous centros de primaria e dous e secundaria. No caso dos centros de primaria o alumnado recibe un obradoiro e tamén unha visita ao espazo de traballo colaborativo para poder coñecer o que é un espazo coworking e como funciona.
No caso dos centros de secundaria e bacharelato o alumnado tamén conta con dúas sesións, unha teorico-práctica con dinámicas participativas sobre emprendemento e unha visita ao coworking na que manter un encontro cos emprendedores e emprendedoras do espazo para coñecer de primeira man os seus proxectos e traxectorias.
O concelleiro de Comercio, Formación e Emprego, Roberto Lojo, participou nunha das xornadas que están impartidas por A Maceta e que teñen un dobre obxectivo. Por un lado dar a coñecer o espazo Lab Barbanza como un centro municipal de formación e emprendemento con opcións de formación para un futuro profesional e, polo outro, espertar no alumnado a curiosidade polo espírito emprendedor.
