O goberno municipal de Noia deu un paso decisivo para garantir a conciliación das familias coa aprobación da ordenanza reguladora do Plan Noia Concilia, que foi levada a votación no pleno celebrado onte, no que tamén se aprobaron os orzamentos municipais.
A nova ordenanza ten como obxectivo blindar e garantir a existencia de servizos de conciliación durante todos os días non lectivos que non sexan festivos, achegando seguridade, estabilidade e certezas ás familias do municipio ao longo de todo o ano.
A concelleira de Educación e Conciliación, Ana Blanco, destacou que “Noia xa viña ampliando os seus servizos de conciliación nos últimos anos, pero era necesario poñer orde, darlle sentido ao conxunto e ofrecer garantías reais ás familias”. Neste sentido, subliñou que o Plan Noia Concilia nace coa vontade de converter a conciliación nun compromiso estable do Concello e non nunha medida puntual.
“O Plan Noia Concilia está pensado para que nais e pais saiban, en todo momento, que o servizo vai existir, cando se vai prestar e en que condicións”, explicou a edil, quen insistiu en que se trata dun modelo planificado e sostido no tempo.
Ana Blanco puxo tamén o foco no papel das crianzas dentro do plan, sinalando que “a palabra conciliación é importante, pero non pode ser a única”. Así, afirmou que os nenos e nenas deben ser os verdadeiros protagonistas, a través da creación de espazos dinámicos, divertidos e inclusivos, que fomenten a socialización e contribúan ao seu desenvolvemento persoal.
A responsable municipal remarcou que o Plan Noia Concilia aposta por un modelo que combina as necesidades das familias coa posta en marcha de actividades atractivas, educativas e lúdicas, nas que os rapaces e rapazas poidan desfrutar, aprender e convivir.
Con esta ordenanza, o goberno municipal reafirma o seu compromiso cunha conciliación real, planificada e de calidade, situando ás crianzas no centro das políticas públicas e convertendo a Noia nun concello que ofrece seguridade e estabilidade ás familias.
