A operación Monterrey deixa detidas a oito persoas, cinco o 12 de xaneiro e tres nun operativo desenvolvido na Coruña, Lugo, Madrid e a comarca do Salnés
Axentes da Policía Nacional, en colaboración coa Axencia Tributaria, interviron 200 quilos de cocaína ocultos nun contedor procedente de Colombia no porto de Vigo e desmantelaron unha organización criminal internacional. A operación, denominada Monterrey, saldouse coa detención de oito persoas, das cales cinco ingresaron en prisión provisional.
A investigación iniciouse en 2024, no marco da cooperación entre ambos os corpos para frear os intentos de organizacións criminais de aproveitar as novas rutas directas entre Latinoamérica e o porto de Vigo. Segundo explicaron os responsables policiais, a rede utilizaba o coñecido modus operandi rip off ou “gancho cego”, que consiste en introducir a droga en contedores de mercadoría legal ou baleiros para retirala unha vez chegados ao porto de destino.
As pescudas permitiron identificar un clan de orixe albanesa que pretendía facerse coa droga tras a chegada dun buque portacontedores. O pasado 12 de xaneiro activouse un dispositivo policial que culminou coa detención de cinco membros da organización: dous deles foron localizados nunha vivenda alugada nas inmediacións de Vigo e os outros tres foron arrestados mentres comían nun restaurante da cidade.
A operación completouse o pasado martes coa detención doutros tres implicados nun operativo desenvolvido na Coruña, Lugo, Madrid e na comarca do Salnés, en Pontevedra.
O líder da rede era un lugartenente dun histórico narcotraficante falecido, coñecido como ‘o narco da Wikipedia’, e contaba coa colaboración dunha organización galega para establecerse na comunidade. Sobre el pesaba unha requisitoria xudicial en vigor para o seu ingreso en prisión por un delito de tráfico de drogas.
No transcurso da operación foron incautados 200 quilos de cocaína distribuídos en catro fardos, así como 20.000 euros en efectivo. Os detidos están acusados de delitos de pertenza a organización criminal e tráfico de drogas.
