O Concello de Noia está a traballar arreo estes días na mellora dos espazos públicos. Segundo informaron fontes do Consistorio, os traballos do servizo municipal de obras centráronse en distintos puntos do concello, poñendo o foco na accesibilidade, na seguridade e no mantemento.
Entre os labores levados a cabo estes días figuran a mellora da accesibilidade no CEIP da Barquiña, a recolocación de pedras no casco histórico e no paseo marítimo ou a posta a punto de beirarrúas en varias zonas do municipio.
Ademais, o tenente de alcalde anunciou a elaboración dun plan de mellora de beirarrúas no centro, que se centrará principalmente na rúa de Galicia, na ponte de San Lázaro e na contorna da Alameda.
Por outra banda, o servizo municipal de augas realizou varias reparacións na rede de saneamento, dando solución a incidencias solicitadas hai máis de 5 anos.
