Este domingo, 11 de xaneiro a partir das 18:00 h, terá lugar a representación teatral O mundo máxico de Pinocho na Casa da Cultura de Porto do Son que fora aprazada o pasado mes de decembro por causa de forza maior.
Nesta obra, executada pola compañía Educateatro Producións, o público atoparase cunha curiosa adaptación ao teatro musical do clásico de Carlo Collodi. Unha historia contada a través dos ollos de Pepiño Grilo, que xunto coa fada Mimadriña, Raposo e Gato acompañará a Pinocho no camiño de converterse nun neno de verdade.
Un camiño que comeza no taller de Gepetto e que pasará pola escola, por un circo de monicreques onde un malvado titiritero tentará raptalo e ata pola barriga dun peixe xigante. Todo para que o protagonista aprenda que dicir mentiras ten as súas consecuencias.
Recomendada para público familiar.
Trátase dunha actuación dentro da programación da Rede Cultural da Deputación da Coruña.
