A conselleira do Mar, Marta Villaverde, mantivo este venres 16 de xaneiro unha reunión cos presidentes da Federación Galega de Confrarías de Pescadores e das federacións provinciais na sede da Consellería, na que lles trasladou o apoio do Goberno galego nas protestas contra o Regulamento de Control da Pesca da Unión Europea e analizou coas organizacións representativas da frota os problemas derivados da súa aplicación práctica.
Durante o encontro dixo que “a Xunta actuou con antelación e dilixencia ao remitir en 2024 alegacións formais ao Ministerio de Agricultura, Pesca e Alimentación sobre este regulamento”, advertindo “das dificultades que a nova normativa ía xerar na frota artesanal e de baixura”. Villaverde lamentou que “esas achegas non fosen atendidas no seu momento, o que tería permitido anticiparse á situación que vive actualmente o sector”, comentou, ao tempo que reiterou “que Galicia comparte os obxectivos de control, rastrexabilidade e loita contra a pesca ilegal”, pero insistiu en “que a aplicación do regulamento, tal e como está formulada, pode supoñer riscos para os pescadores á hora de traballar e exposición a sancións innecesarias”. Así, sinalou que “resulta desproporcionada e pouco realista para embarcacións pequenas, con mareas curtas e sen medios técnicos para cumprir con esixencias como o rexistro exacto das capturas a bordo ou os prazos de notificación previa de entrada a porto”.
Marta Villaverde defendeu novamente “a necesidade dunha implantación flexíbel, progresiva e adaptada ás características da pesca artesanal galega, evitando cargas administrativas innecesarias e un réxime sancionador que xere inseguridade xurídica entre os profesionais do mar”. Tamén se comprometeu a “seguir exercendo de interlocutora activa ante o Ministerio e a defender en todos os ámbitos unha aplicación do regulamento compatible coa viabilidade económica do sector e co mantemento do emprego e da remuda xeracional”.
Na reunión tamén se abordaron outros asuntos de interese para o sector, como por exemplo algúns relacionados coa formación, o estado de tramitación de ordes de axudas de cara a este novo ano, ou do avance na modificación de textos lexislativos como o do Estatuto da muller traballadora do mar, a xestión dos excedentes do marisqueo ou a modificación do decreto de artes.
Así mesmo, a conselleira do Mar e os representantes das confrarías falaron sobre o Regulamento europeo de TAC e Cotas, na liña de seguir insistindo ao Goberno central para que “busque en Bruxelas fórmulas que poidan atenuar os efectos negativos da negociación levada a cabo o pasado mes de decembro e que estableceu recortes de posibilidades de pesca moi daniños en especies como o xarda, o lirio e o abadexo”.
