A Policía Nacional detectou unha campaña de phishing na que se suplanta a identidade da Universidade de Santiago de Compostela (USC) coa finalidade de estafar ao alumnado.
A Policía Nacional alertou este sábado sobre o envío “masivo” de correos electrónicos falsos a alumnos da Universidade de Santiago de Compostela (USC) que, baixo o pretexto da reclamación dun pagamento pendente relacionado co abono da matrícula, solicitan unha transferencia de 550 euros a unha conta bancaria.
Desde a pasada semana, varias persoas presentaron denuncias en dependencias policiais tras recibir correos electrónicos fraudulentos que seguen o mesmo modus operandi. Os ciberestafadores envían mensaxes de forma masiva dirixidas a estudantes da USC, nas que, facéndose pasar pola Universidade, reclaman o pagamento pendente de 550 euros correspondente, supostamente, ao abono da matrícula.
Nos correos electrónicos inclúese un número de conta bancaria no que se solicita realizar o ingreso con carácter urxente, así como o envío posterior dun comprobante de pagamento.
Unha vez detectada esta estafa en liña, a Policía Nacional, a Universidade de Santiago de Compostela e a entidade bancaria implicada puxeron en marcha unha liña de traballo conxunta para neutralizar esta campaña delituosa, que utiliza de forma fraudulenta o nome da USC, e avanzar na identificación e detención dos responsables.
Consellos da Policía Nacional para evitar estafas de phishing
A Policía Nacional recomenda seguir unha serie de pautas básicas de seguridade:
- Analizar con detemento calquera notificación recibida por correo electrónico, SMS ou outros medios na que se solicite o pagamento de diñeiro.
- Verificar sempre as ligazóns antes de abrílas. Os estafadores empregan dominios que non se corresponden cos oficiais, modificando letras ou a súa orde para aparentar autenticidade.
- Desconfiar dos dominios xenéricos. A maioría das entidades utilizan dominios rexistrados co seu nome ou siglas oficiais.
- Manterse alerta ante calquera solicitude de diñeiro ou de datos persoais ou bancarios, xa que estes poden ser utilizados posteriormente para cometer novas estafas.
A Policía Nacional lembra a importancia de denunciar calquera intento de fraude para facilitar a investigación e evitar que outras persoas resulten afectadas.
