Ampliada a alerta laranxa por temporal costeiro para mañá ao oeste da Coruña
O tempo manterase inestable nas Rías Baixas e na comarca de Santiago baixo a influencia dunha circulación do noroeste que arrastra aire frío procedente de latitudes máis altas. Esta situación deixará ceos maioritariamente nubrados e chuvascos, que serán máis frecuentes e intensos durante a primeira metade da xornada.
Nas Rías Baixas agárdanse precipitacións intermitentes, con momentos de chuvia máis persistente, mentres que en Santiago de Compostela os chuvascos tamén estarán presentes, especialmente durante a mañá, tendendo a remitir cara ao final do día.
As temperaturas sufrirán un lixeiro descenso, con valores máis baixos no interior(6 a 12 graos). Os ventos soprarán do noroeste, moderados en xeral, con intervalos fortes no litoral das Rías Baixas, contribuíndo a unha sensación térmica máis fría.
A cota de neve situarase arredor dos 900 aos 1.000 metros, polo que non se descartan nevadas nas zonas altas do interior galego, aínda que sen afectar directamente ás áreas costeiras nin á capital compostelá.
O noso mar: Vento do noroeste, forza 5 a 6 á mañá, 4 a 5 á tarde e 3 a 4 á noite. Forte marusía á mañá e á tarde e marusía á noite. Visibilidade boa á mañá e á noite e regular á tarde. Mar de fondo do noroeste, con ondas de 1.5 a 2.5 metros á mañá, 2.5 a 3.5 metros á tarde e 3 a 4 metros á noite.
