As Rías Baixas e a comarca de Santiago de Compostela veranse afectadas este venres 30, pola chegada dunha nova borrasca, situada ao suroeste de Irlanda, que traerá asociada unha fronte fría moi activa. A situación deixará un día marcado pola inestabilidade meteorolóxica, con ceos parcialmente nubados e precipitacións frecuentes.
Nas Rías Baixas agárdanse chuvias máis persistentes e localmente intensas, especialmente durante a segunda metade do día, con posibilidade de treboadas e episodios puntuais de saraiba. En Santiago de Compostela tamén se prevén precipitacións, que poderán ser moderadas a fortes nalgúns momentos, acompañadas de aparello eléctrico.
As temperaturas experimentarán un descenso lixeiro a moderado en toda a zona, mentres que a cota de neve irá baixando progresivamente ata situarse arredor dos 900 a 1.000 metros ao final da xornada, afectando principalmente ás zonas de montaña do interior galego.
O vento soprará do oeste-suroeste con intensidade, sendo especialmente forte no litoral das Rías Baixas, onde se esperan refachos moi fortes, así como en zonas elevadas do interior. Recoméndase extremar a precaución nas áreas costeiras e durante os desprazamentos.
O noso mar: Vento do sudoeste á mañá, do oeste á tarde e do noroeste á noite, forza 6 a 7 á mañá e 6 a 8 á tarde e á noite. Media vaga á mañá e vaga á tarde e á noite. Visibilidade regular. Mar de fondo do noroeste, con ondas de 5 a 6 metros á mañá, 3 a 4 metros á tarde e 4 a 5 metros á noite.
