Este venres o 112 Galicia vén de rexistrar un total de 427 incidencias relacionadas cos efectos da meteoroloxía adversa que afecta á comunidade galega, nun contexto marcado por avisos laranxas por neve en varias zonas do interior e por fenómenos costeiros en todo o litoral galego.
A maior parte das incidencias xestionadas están relacionadas coa presenza de árbores e pólas nas estradas (161). Séguenlles as actuacións de prevención de riscos (63), como apuntalamentos ou revisións de elementos inestables; os restos de accidentes ou obxectos na vía (47), ao mesmo nivel que os restos de cables e postes de luz (47). Ademais, contabilizáronse 61 incidencias vinculadas á circulación por neve ou placas de xeo e 16 derrubamentos. Por provincias, o maior número de incidencias rexistrouse en Pontevedra (165) e A Coruña (161), seguidas de Ourense (63) e Lugo (37).
Dúas persoas foron excarceradas tras unha colisión que implicou a catro turismos e un camión na AP-9 ao seu paso por Santiago
Tres persoas foron trasladadas e os bombeiros traballaron para liberar aos condutores de dous dos vehículos.
Ás 8:30 horas, o 112 Galicia tivo constancia deste accidente a través dun particular implicado. Este explicou que acababa de colidir contra outro vehículo no quilómetro 69 da AP-9 en sentido A Coruña, á altura de Santiago. O alertador explicou que conseguira saír, pero podía haber persoas atrapadas.
Desde o Centro Integrado de Atención ás Emerxencias solicitouse a acción de Urxencias Sanitarias de Galicia-061, dos Bombeiros de Santiago, da Garda Civil de Tráfico e dos servizos de mantemento da estrada.
Unha vez no punto, os bombeiros confirmaron que tiveron que excarcerar aos condutores de dous vehículos implicados.
Finalmente, os servizos sanitarios evacuaron a tres persoas ao hospital de referencia.
