O Centro Social de Abanqueiro (Boiro) vai dar acollida este venres 5 de decembro a un novo espectáculo para a rapazada organizado pola Concellería de Cultura: Onde viven os monstros, unha representación teatral de Títeres Brincadeira para público familiar. Será este venres ás 20.00 horas, con venda de entradas dende unha hora antes da función.
Trátase dunha adaptación para monicreques argallada por Carmen Domech do clásico de Maurice Sendak, acompañada de pequenos contos monstruosos.
Nesta historia, chea de humor e diversión, Max crea na súa habitación un mundo imaxinario onde é libre. Libre mesmo para ser monstro, o máis monstro de todos. Na súa aventura, desafía aos seus propios medos, a frustración, a rabia, a incomprensión ou o temor ao rexeitamento. Finalmente, atopar en falta o amor da súa nai faino regresar a casa e comprende que sempre cómpre respectar aos demais.
