A entidade Solo Empresarial do Atlántico (SEA) adxudicou á empresa Estudo Técnico Galego a elaboración do estudo de viabilidade, que determinará as condicións técnicas, económicas, urbanística e ambientais necesarias para a posíbel ampliación do parque empresarial de Noia.
A xerente de SEA, Beatriz Sestayo, mantivo este xoves 4 de decembro unha reunión con responsábeis de Estudo Técnico Galego, que se comprometeron a emitir un informe preliminar durante o mes de decembro. O estudo completo será entregado ao longo do mes de xaneiro de 2026.
Sestayo subliñou “o gran interese de SEA nesta zona porque cremos absolutamente no seu potencial económico”. Lembrou que a intención da entidade que dirixe é promocionar o asentamento de novas empresas en Galicia, xerando emprego e crecemento económico, e engadiu que “esta zona necesita que a apoiemos, porque existe unha gran demanda por parte do empresariado”.
Sestayo destacou ademais que a colaboración cos concellos é “esencial” para avanzar nestes desenvolvementos, valorando a implicación do Concello de Noia en facer posíbel o proxecto.
En conversa co alcalde, este trasladoulle a Sestayo a urxencia de dispoñer de máis superficie industrial, xa que o existente se atopa completamente esgotada e a demanda é altísima. Quixo agradecer a SEA a súa rápida resposta e comprometeu todo o apoio do seu equipo de goberno para conseguir alcanzar unha meta que supoñería un impulso decisivo para o desenvolvemento económico dea zona.
“Noia leva anos limitada non seu medre económico pola falta de solo industrial”, subliñou o rexedor, engadindo que “xa estamos a dar os primeiros pasos para resolver esta eiva”, e, de feito, n a propia reunión comunicou a Beatriz Sestayo que xa mantivera algunhas xuntanzas con empresarios da zona que lle aseguraron o seu firme interese en asentarse na posíbel superficie industrial.
Neste sentido, Sestayo confirmou que SEA considera a Noia como un espazo de alto potencial para ampliar o solo empresarial e adiantou que “se o estudo resulta favorábel, o primeiro que faremos é reunirnos tamén cos empresarios para testar a súa vontade de implantación na superficie industrial e recoller as súas solicitudes, ideas, necesidades para que o proxecto se desenvolva de forma adecuada e eficiente”.
