Ribeira deu a benvida a unha nova actividade incluída na programación do Nadal Cultural 2025-2026 impulsada pola Concellería de Cultura: o Recuncho de Nadal. A iniciativa, pensada especialmente para o público infantil e familiar, ten como escenario unha casiña instalada na praza de Porta do Sol.
A apertura tivo lugar esta tarde coa visita do Apalpador, quen se encargou de comprobar se a rapazada se portou ben e comeu axeitadamente ao longo do ano, repartindo caramelos como agasallo. O acto contou tamén coa presenza dos populares Bolechas, que se achegaron á cidade a través da Rede de Dinamización Lingüística, enchendo de ilusión e animación o espazo.
A programación do Recuncho de Nadal continuará nos vindeiros días coa visita doutros personaxes emblemáticos destas datas. Así, Papá Noel estará presente o 24 de decembro, en horario de 12.00 a 13.30 e de 17.00 a 19.00 horas.
Pola súa banda, o Carteiro Real será o encargado de recoller as cartas e peticións dos nenos e nenas dirixidas aos Reis Magos os días 26, 29 e 30 de decembro e o 2 de xaneiro, de 17.00 a 19.00 horas; o 27 de decembro e o 3 de xaneiro, de 12.00 a 13.30 e de 17.00 a 19.00 horas; e o 5 de xaneiro, de 12.00 a 13.30 horas.
Ademais, o Apalpador regresará a Ribeira o 31 de decembro, cun dobre pase de 12.00 a 13.30 e de 17.00 a 19.00 horas, pechando así o ano cunha actividade pensada para manter viva a tradición e a maxia do Nadal.
