Entre os proxectos aprobados este luns 29 de decembro no pleno da Corporación de Rianxo figura a renovación dun novo treito do paseo marítimo, unha infraestrutura de gran importancia turística que ademais dá servizo diario a centos de veciños nas súas actividades de lecer ao aire libre. O proxecto foi aprobado cos votos a favor de Rianxo en Común, Partido Popular e BNG e para materializalo o Concello participará no POS+ Adicional 4/2025 da Deputación da Coruña. A iniciativa, que conta cun orzamento de 227.360,21 €, permitirá remodelar o firme do paseo marítimo entre Rinlo e a praia do Pazo. Retirarase o actual firme de lousas e dispoñerase un novo base de formigón pulido roloteado, moito máis seguro e sustentábel dende o punto de vista do seu mantemento.
