O pleno da Corporación de Rianxo celebrado este luns 29 de decembro saldouse con importantes acordos, entre eles a aprobación da proposta do Goberno para participar no POS+ Adicional 1/2026 da Deputación da Coruña por un importe total de 82.456,46€.
A proposta (que contou cos votos a favor de Rianxo en Común, do Partido Popular e do BNG) permitirá, entre outras cousas, financiar o servizo de apoio social e comunitario destinado a persoas con sufrimento psíquico, o servizo de envellecemento activo posto en funcionamento nas parroquias, así como as axudas municipais de emerxencia para persoas en risco de exclusión.
Con cargo aos fondos provinciais tamén se ampliará o catálogo do servizo gratuíto de préstamo de axudas técnicas do Concello de Rianxo. aumentaranse as prazas do programa Xantar da Casa, segundo informou o alcalde Julián Bustelo.
