O Instituto Tecnolóxico para o Control do Medio Mariño (Intecmar) decretou a reapertura de varios bancos marisqueiros na ría de Pontevedra e de diferentes polígonos de bateas de mexillón na ría de Arousa, tras constatar unha mellora na presenza de toxinas no medio mariño.
A marea vermella por toxina lipofílica —causante de episodios de diarrea e responsable do peche de numerosas zonas de produción nas últimas semanas— inicia así unha fase de remisión que permite recuperar parte da actividade marisqueira e bateeira.
No que respecta a os polígonos de cultivo, este xoves quedou reaberto o de Sada 1, na ría de Ares-Betanzos. Tamén retomaron a actividade os polígonos A Pobra A e C, na ría de Arousa, onde hai dous días xa foran reabertos os de Vilagarcía B1 e B2. A pesar destes avances, continúan pechados aproximadamente tres de cada catro dos máis de 50 polígonos existentes en Galicia.
Paralelamente, durante esta semana tamén reabriron diversos bancos marisqueiros na ría de Pontevedra, en zonas como Poio, así como na coruñesa ría do Burgo.
Con estas novas autorizacións, unicamente permanecen pechados en Galicia os bancos de Corcubión-Fisterra, tres zonas da ría de Pontevedra e outras tres áreas da ría de Vigo.
