O Concello de Ribeira despediu o mes de novembro culminando o proceso de compra das parcelas pendentes para o futuro polígono industrial. En concreto, este último proceso de compra atinxiu a dúas fincas situadas no termo municipal da Pobra do Caramiñal afectadas polo futuro polígono industrial ribeirense, por un importe total de 39.754,13 euros.
A alcaldesa, María Sampedro, destacou que “cumprimos co noso compromiso de que os terreos quedasen mercados no mes de novembro. Isto supón un paso máis cara a materialización do futuro complexo empresarial, que posibilitará que medre o noso tecido produtivo e, en consecuencia, a economía local. Cremos que é unha boa nova para o conxunto da cidadanía e chegamos a este punto mediante un acordo cos propietarios das parcelas afectadas”.
Engadiu que o proxecto da ampliación do solo industrial eríxese “como unha das nosas prioridades, pois consideramos que é preciso acelerar o proceso para que pase do papel á realidade. Agora poñeremos todo o noso empeño para buscar vías de financiamento que permitan executar esta ansiada aspiración”, sinalou a rexedora.
