O alcalde, José Ramón Romero, e a concelleira de Ensino, Carmen Silva, recibiron na mañá deste mércores 3 de decembro, no salón de plenos do Concello de Boiro, ao alumnado de 5º de primaria do CEIP Santa Baia de Boiro. Durante a xornada tiveron oportunidade de trasladar as súas inquedanzas sobre as principais problemáticas detectadas no municipio.
Na visita, os voceiros das distintas aulas do centro, trasladaron ao alcalde e á concelleira as súas inquedanzas en canto á contaminación ou o cambio climático e puideron preguntar ao primeiro edil polas medidas que está a levar a cabo o Concello en materia medioambiental e de coidado do medio.
A rapaza mostrouse especialmente interesada no traballo dos departamentos municipais encargados da limpeza viaria, a recollida de lixo e o saneamento para garantir a limpeza do municipio e o coidado do noso medio.
O alcalde, José Ramón Romero, deu resposta a todas as preguntas e inquedanzas formuladas polos nenos e nenas e mostrouse gratamente sorprendido “pola implicación destes rapaces e rapazas na actualidade municipal e polo gran coñecemento que teñen do funcionamento dos servizos públicos e o seu interese en cambiar hábitos que nos van levar a un futuro mellor”.
