O Concello de Boiro pecha o ano cun importe licitado en obras e actuacións subvencionadas de 6.743.259 euros. Entre os contratos máis destacados están a rehabilitación da Casa da Cultura de Boiro, instalación de fotovoltaicas en inmóbeis municipais ou pavimentos en diversos puntos do municipio.
“Algunhas das actuacións están xa finalizadas e outras atópanse en fase de execución”, informou o Concello, engadindo que a actuación máis grande licitada este ano é rehabilitación integral da Casa da Cultura de Boiro, unha actuación que ascende aos 3.854.895 euros e que conta co financiamento do Ministerio de Transportes e Mobilidade Sostible e o Ministerio de Vivenda e Axenda Urbana mediante o PIREP Local mediante a que se vai acondicionar o edificio ás necesidades actuais dotándoo de accesibilidade universal e eficiencia enerxéticas.
Entre as actuacións realizadas atópanse as instalacións de fotovoltaicas en Protección Civil, instalación deportiva da Cachada e Pavillón de Praia Xardín; unhas actuacións financiadas polo INEGA e que ascenden aos 242.590 euros.
Amais, adxudicouse a adquisición de dous vehículos, un multiservizo e un camión de biorresiduos; e a rehabilitación dunha vivenda para destinar a emerxencia social.
En canto a pavimentados licitáronse actuacións en Moimenta, Mañóns, no Polígono Industrial de Espiñeira, no Boiro de Arriba, a Aspra, Cubeliños, Xian, Runs e San Mauro ou no Esteiro. Tamén se licitaron actuacións no parque de Cimadevila, o lavadoiro de Comoxo, beirarrúas da Avenida da Constitución.
“Isto é o resultado dun gran traballo dende diversos departamentos municipais para a captación de fondos de outras administracións que nos permiten levar a cabo obras ou adquisicións que non serían posibles unicamente con fondos propios”, afirmou o alcalde, José Ramón Romero.
