Julio Abalde salienta o labor do Laboratorio Ecosocial do Barbanza para recuperar e protexer o territorio
O Laboratorio Ecosocial do Barbanza (Fundación Ría, presentou en Rianxo, nun acto co-organizado polo Concello, os resultados dos seus seis anos de traballo pola xestión sostíbel dos montes do Barbanza. A xornada celebrouse no Pazo de Martelo (Praza Rafael Dieste, Rianxo) e estivo aberto á cidadanía. Serviu para facer balance de seis anos de traballo que están a consolidar o Laboratorio como un proxecto referente na prevención de incendios, recuperación de terras en abandono, creación de emprego verde e fortalecemento da biodiversidade no Barbanza.
No evento interviñeron Julián Bustelo, alcalde de Rianxo; Rosa Ana García, deputada de Emprego e Industria da Deputación da Coruña; e Julio Abalde Alonso, subdelegado do Goberno de España na Coruña, xunto a outros representantes das entidades socias do proxecto.
O Laboratorio Ecosocial do Barbanza é unha iniciativa da Fundación RIA e do grupo de investigación HISTAGRA da USC, que naceu en 2020 co obxectivo de promover unha reactivación sostible do territorio a partir do coñecemento das comunidades locais. Ao longo destes catro anos, o proxecto foi medrando en rede, incorporando axentes do territorio: comunidades de montes, universidades, administracións e outras entidades do terceiro sector. A Fundación RIA coordina este proxecto, integrado pola Plataforma pola Defensa del Monte, a Universidade de Santiago de Compostela (a través do CISPAC e os grupos de investigación HISTAGRA e UXAFLORES), a Universidade Pablo de Olavide, o Concello de Rianxo e a Fundación Montescola.
Julio Abalde, subdelegado do Goberno na Coruña, sinalou que “este é un proxecto estratéxico que combina ciencia, compromiso comunitario e innovación para impulsar un novo modelo de xestión sostíbel no Barbanza”.
Lembrou que en febreiro de 2024, a iniciativa recibiu un impulso de 2 millóns de euros das axudas para o fomento da bioeconomía forestal da Fundación Biodiversidade do MITECO, orientadas a avanzar en tres grandes eixes: prevención de incendios e multifuncionalidade forestal, creación de emprego verde e investigación con participación comunitaria. Tamén salientou que entre os resultados máis relevantes acadados até o momento destaca a planificación conxunta de máis de 2.000 hectáreas, actuacións silvícolas en máis de 500 hectáreas, a participación de 600 persoas voluntarias en accións de restauración ambiental e o desenvolvemento de liñas de investigación en servizos ecosistémicos e rehabilitación de solos.
O proxecto continúa medrando con novas accións, como un plan de ordenación conxunta en seis comunidades de montes, a posta en marcha dun rabaño mancomunado de máis de 130 cabras, a creación dunha comunidade enerxética, a produción de compost, a plantación de frondosas e o uso compartido dun aserradoiro portátil, ademais da creación de emprego local e da implicación do tecido educativo e voluntario da zona.
O recoñecemento outorgado polo MITECO o pasado mes de setembro no acto celebrado no Colexio Oficial de Arquitectos de Madrid, presidido pola ministra Sara Aagesen, pon de manifesto a capacidade do Laboratorio Ecosocial do Barbanza para articular coñecemento científico, xestión comunitaria e coordinación institucional. Tal e como subliñou Abalde, “o Laboratorio Ecosocial do Barbanza demostra que a cooperación institucional e comunitaria é clave para recuperar e protexer o territorio”.
O proxecto conta co apoio da Fundación Biodiversidade do MITECO no marco do PRTR, financiado pola Unión Europea – NextGenerationEU.
