A mañá da cuarta xornada (a do sábado 13) da VIII Mostra Internacional de Cinema Documental Mares da Fin do Mundo comezou ás 11:00 h co segundo bloque da Sección Galega na Sala Arcos Moldes do Auditorio de Rianxo. Abriu o bloque Chelito, de Carlos Prado Pampín (Galicia, 2025), un filme que narra a vida de Chelito, unha das praceiras máis famosas e veteranas da Coruña, que tras quedar embarazada sendo adolescente non tivo máis remedio que seguir os pasos de súa nai coma peixeira.
Deseguido, foi a quenda de Testemuñas dunha illa, de Borja Duarte Quintáns, Elian Mercedes Antigua e Guillermo Artero García (Galicia, 2025), que pon o foco na construción da ponte da Illa de Arousa no ano 1985, unha obra que mudou para sempre o modo de vida dos habitantes da illa.
Pechou o bloque A tarea, de Alfonso O ́Donnell (Galicia, 2024), que documenta a loita dun grupo de mariscadoras a pé para manter un traballo duro cuxa tradición se extingue por diversos motivos. Durante a sesión, contouse coa presenza dos cineastas Carlos Prado Pampín, Borja Duarte Quintáns, Elian Mercedes Antigua e Guillermo Artero García, quen ao remate da mesma intercambiaron pareceres cos asistentes.
A continuación, ás 13:00 h na mesma Sala Arcos Moldes proxectáronse os últimos 4 títulos da Competición Oficial. O primeiro filme foi Pêche, de Luzie Kurth (Bélxica, 2024), un retrato poético que revela unha práctica en perigo de extinción, a pesca de cangrexos con cabalo na costa belga. A continuación, presentouse Lost Songs of Sundari, de Sudarshan Sawant (India, 2025), un filme que nos traslada a Bombai para poñer o foco na ameaza que o crecemento da cidade supón para o pobo Koli e o seu modo de vida tradicional. O festival continuou coa proxección de Deriva, de Yurian Quintanas e Salvi Danés (España, 2025), un filme que constrúe unha fábula sobre a transformación do territorio e a perda dun legado. Pechou a Competición Oficial o filme Just Sea, de Franziska von Stenglin (Malta/Alemaña, 2024), que pon o foco nas reflexións de Salvo, un pescador da illa mediterránea de Gozo, sobre os drásticos cambios que presenciou ao longo da súa vida.
Xa pola tarde, o histórico Pazo do Martelo acolleu o espazo de debate Mares de Madeira, coa celebración de dúas mesas redondas que abordaron temáticas vinculadas á nosa tradición mariñeira. Ás 17:00 h celebrouse a primeira baixo o título Mares de madeira: Carpintaría de ribeira, que xirou en torno ao valor histórico e patrimonial desta profesión, e na que tamén se reflexionou sobre o seu futuro. Moderada por Marcos Gallego (director de MDFDM), contou coa presenza de Lino Lema (Museo do Pobo Galego), Ramón Collazo (presidente de AGALCARI) e Francisco Xosé Fernández “Chisco” (escritor). Ás 19:00 h, e como peche do día, tivo lugar a mesa Mares de madeira: Navegación Tradicional, na que se analizou a dimensión histórica e os retos de futuro da navegación tradicional nas costas de Galicia. Estivo tamén moderada por Marcos Gallego (director de MDFDM) e nela participaron Olalla Figueira (concelleira do Mar de Rianxo), Pepe Sacau (presidente de Culturmar), e Alberto Martínez e Teresa Couto (Asociación Cultural Balandro Joaquín Vieta).
A Mostra Internacional de Cinema Documental Mares da Fin do Mundo está organizada pola Asociación Cultural Mares da Fin do Mundo, coa colaboración na dirección e produción de ABA Films e o apoio, entre outros, da Deputación da Coruña, a Dirección Xeral de Política Lingüística da Xunta de Galicia e o Concello de Rianxo. Así mesmo, MDFDM forma parte de Proxecta (Coordinadora Galega de Festivais de Cinema, integrada na federación estatal Pantalla).
