A asociación inclusiva da nosa comarca Amicos celebrou este mércores, 17 de decembro, o acto de peche do curso Atención á clientela en entornos aeroportuarios, no que participaron un total de once persoas nas últimas semanas e que esta mañá recibiron os seus diplomas de mans de Miguel
Beiro, responsable de Alianzas con Persoas e Empresas de Amicos. Esta formación realizouse ao abeiro do proxecto Amicos OnBoarding, posto en marcha pola asociación Amicos e financiada por Enaire.
Amicos-Inclusión: OnBoarding é un proxecto que desenvolve itinerarios de inserción laboral vinculados ás necesidades e demandas de emprego nos aeroportos galegos. O obxectivo desta iniciativa é “facilitar o acceso ao mercado laboral das persoas con discapacidade, ao tempo que se favorece a súa inclusión en espazos públicos”.
Neste senso, estes itinerarios seguen unha metodoloxía centrada na persoa, cun servizo de orientación laboral especializado, apoio para a inserción na empresa e acompañamento e asesoramento. Isto, tanto para a persoa usuaria coma para a empresa, co obxectivo non só de promocionar a contratación por parte de empresas relacionadas cos aeroportos galegos, senón tamén de outorgar ferramentas para o mantemento do emprego.
Dende a súa posta en marcha, en abril de 2025, o equipo do proxecto atendeu a máis dunha trintena de persoas e formou á mesma cantidade. Isto supón un 170% do obxectivo de atender a un total de 20 persoas e o 261% das 13 fixadas para formar. Asemade, realizáronse un total de 127 horas de orientación e conseguiuse o 43% das insercións fixadas. A iniciativa desenvolverase ata abril do próximo ano.
Enaire, aliado da inserción laboral de persoas con discapacidade
Enaire é o xestor estatal da navegación aérea en España. Como empresa do Ministerio de Transportes e Mobilidade Sostible, presta servizos de control de tránsito aéreo nas fases de Ruta e Aproximación de todos os voos con orixe/destino nacional e sobrevoos. Ademais, xestiona os servizos de comunicacións, navegación e vixilancia de Enaire no conxunto do espazo aéreo e en toda a rede de aeroportos de AENA en España, e proporciona os servizos de control de tráfico aéreo de aeródromo en 21 aeroportos, entre eles os de maior tráfico.
Enaire é o cuarto xestor europeo de tráfico aéreo, e é membro das alianzas internacionais Alianza A6, SESAR Joint Undertaking, SESAR Deployment Manager, iTEC, CANSO e ten unha intensa colaboración con OACI. Enaire obtivo a maior cualificación no indicador clave de rendemento en seguridade aérea a escala europea por cinco anualidades consecutivas. Ademais, conta co Selo EFQM 600 pola súa xestión segura, eficiente, innovadora e sostible dos servizos de navegación aérea.
