O Concello de Dodro informou de que nos últimos días incorporouse ao equipo da Administración local unha arquitecta no servizo de urbanismo. Segundo informaron dende o Consistorio, esta nova traballadora é froito da “aprobación da relación de postos de traballo e dun esforzo orzamentario por parte do Goberno municipal”. O obxectivo é “axudar na axilidade do departamento e poderá resolver as consultas veciñais que poidan xurdir”.
A incorporación levouse a cabo a través dun convenio de colaboración coa Deputación da Coruña para a encomenda de xestión da selección de arquitectos e arquitectas técnicos destinada a concellos de menos de 20.000 habitantes. O acordo que posibilitou esta medida, impulsado polo Goberno local, contou co apoio da maioría progresista, mentres que o Partido Popular e Xente de Dodro votaron en contra.
