As dúas persoas, nai e filla, foron hospitalizadas no Hospital Clínico Universitario de Santiago.
As dúas afectadas presentaban intoxicación severa de monóxido, segundo informaron os facultativos sanitarios ao 112 Galicia. Con todo, as súas vidas non corren perigo.
Os feitos sucederon esta pasada madrugada, na vivenda das afectadas, situada na Rúa do Hospitaliño, en Santiago de Compostela. Sobre as 04:00 horas, unha persoa particular chamaba ao 112 Galicia para solicitar comunicación cos profesionais do Servizo de Urxencias Sanitarias de Galicia-061.
Ao fío das 06:30 horas, os xestores de emerxencias recibían a chamada dos facultativos do Complexo hospitalario, que confirmaban o ingreso de dúas mulleres por intoxicación de monóxido de carbono. Indicaban que, posiblemente, un escape de gas na vivenda, podía ser a causa.
Así, con esta información, os xestores do 112 puxeron os feitos en coñecemento dos Bombeiros de Compostela, da Policía Nacional e da Local. Nada mais chegar ao lugar e feitas correspondentes medicións, os Bombeiros confirmaron a presenza de niveis deste gas na vivenda, aínda que aseguraron que non había combustión no seu interior.
Por elo, dende o 112 Galicia tamén se informou ao persoal da compañía subministradora de gas.
