Dúas persoas resultaron feridas nas últimas horas en senllos accidentes de tráfico rexistrados en Santiago de Compostela e en Catoira, ambos con vehículos envorcados e coa necesidade de excarceración dos ocupantes.
Tres turismos implicados na N-525, en Santiago
O primeiro sinistro tivo lugar minutos antes das 7:00 horas na rotonda situada á altura do quilómetro 337 da N-525, na parroquia compostelá do Eixo. Varios particulares alertaron ao 112 Galicia da presenza de tres coches accidentados, un deles volcado, e avisaron de que un dos condutores non podía saír do interior do vehículo.
Activouse de inmediato un operativo no que participaron Urxencias Sanitarias de Galicia-061, a Garda Civil de Tráfico, os Bombeiros e a Policía Local de Santiago. Os bombeiros tiveron que intervir para liberar ao condutor atrapado.
Dúas persoas foron finalmente evacuadas ao Hospital Clínico Universitario de Santiago para a súa valoración médica.
Outro condutor excarcerado en Catoira
Pouco despois, rexistrouse outro accidente no quilómetro 5 da PO-548, na zona de Oeste (Catoira). O 112 Galicia recibiu o aviso a través de Urxencias Sanitarias de Galicia-061, que informaba do envorco dun coche e da posible presenza dunha persoa no interior.
Ao chegar ao punto, os equipos de intervención confirmaron a necesidade de excarceración. Os Bombeiros do Salnés e o GES de Padrón liberaron á vítima, que posteriormente foi trasladada en ambulancia ao centro hospitalario de referencia.
No operativo participaron tamén a Garda Civil de Tráfico e voluntarios de Protección Civil de Valga.
