Dende Amnistía Internacional Galicia veñen de organizar a xira de Rosanna Marzán, defensora dos Dereitos Humanos dominicana. Deste xeito, Rosanna visitará varias cidades e vilas galegas a comezos do mes de decembro, coincidindo coa celebración do Día Internacional dos Dereitos Humanos o vindeiro 10 de decembro.
Máis polo miúdo: Pobra do Caramiñal, Boiro, Vilagarcía e Pontevedra terán a oportunidade de coñecer de primeira man a súa experiencia como activista LGTBIQ+. Rosanna é avogada e educadora social e leva dende o ano 2012 liderando a organización Diversidad Dominicana, adicada a promover os dereitos das persoas do colectivo no seu país e na rexión. O seu enfoque Interseccional e inclusivo foi fundamental para a loita pola igualdade e visibilidade de comunidades vulnerábeis, algo que consegue por medio da loita contra os discursos de odio e a prol da visibilización e desmitificación de mentiras contra as persoas LGTBIQ+. Para isto, dende o ano 2015 acompaña en procesos de litixio no Sistema Interamericano de Dereitos Humanos. En recoñecemento por este traballo, Marzán recibiu en 2019 o Premio Front Line Defenders para Personas Defensoras de los Derechos Humanos en Riesgo. Este galardón, outorgado por primeira vez a 5 activistas LGTBIQ+ de distintas partes do mundo, salientou a súa valentía e compromiso na defensa dos DDHH, aínda asumindo graves ameazas persoais.
Indo á xira galega de Rosanna Marzán:
– 03/12 ás 20h no Auditorio da Biblioteca Municipal de Pobra do Caramiñal. Mesa redonda xunto coa participación de Marisol Guevara (Mulleres en Acción) e Laura Ríos (AC Malas Herbas) e moderada por Toni Alonso (Amnistía Internacional).
– 04/12 dende as 10:30h participación en encontros co alumnado do IES Espiñeira de Boiro (non aberto ao público).
– 04/12 ás 19:30h na Libraría Planeta Mozo (Antiga Follas Novas), Vilagarcía. Parladoiro organizado xunto coa organización O soño de Lilith.
– 05/12 ás 11h na biblioteca da EPAPU Río Lérez de Pontevedra, gravación dun pódcast e encontro co alumnado e organizacións locais.
